VB kvinnur í 1943

 

Vágs Bóltfelag er stovnað 5 juni 1905. Fyrst sum eitt fótbóltfelag og seinni tók hondbólturin seg upp.

Hetta er at lesa úr heimasíðuni hjá Hondbólt Samband Føroya

Áhugin fyri hondbólti breiðir seg
Tað var heilt skjótt, at áhugin fyri hesi ítróttagrein spretti aðrastaðni í Føroyum. Tað sigst, at kvinnuhondbólturin byrjaði í Klaksvík og heima á Sandi fyrst í tretivuárunum. Í 1935 vórðu fyrstu royndirnar við hondbólti gjørdar í Sørvági og í Vági í 1936-37. Longu í 1939 skipaði VB seg við einari hondbóltsdeild. Kvinnur spældu eisini hondbólt í tríatiárunum. Á Eiði byrjaði hondbólturin um somu tíð, kvinnurnar vóru at síggja niðri á Mølini longu í 1937. Í Fuglafirði spældu kvinnurnar eisini hondbólt hesi árini niðri á sandinum.

Fyrsta føroyameistarakappingin var í 1943. Bæði kvinnur og menn kappaðust, sjey kvinnulið og fýra manslið. Hjá kvinnunum luttóku Neistin, Aldan, Ternan, Stjørnan, Vípan, TB og VB. Hjá monnunum kappaðust STÍF, VÍF og tvey lið úr Havn, skótar mannaðu annað og Havnar Fimleikafelag hitt.

VB hevur vunnið føroyameistaraheitið hjá kvinnum 3 ferðir. VB vann fyrstu ferð í 1950 og so aftur í 2003 & 2005. 

1980 var uppá mangar mátar eitt merkisár í føroyskum hondbólti. HSF var sett á stovn og CHM var eisini hildið í Føroyum fyri fullum hallum í Havn, Klaksvík og Vági.
Hetta var eisini eitt minniligt ár fyri VB. Høllin á Eiðinum var tikin í brúk og var tað Lula Augustinussen, sum skeyt fyrsta málið í Vágs Høll og fekk handa eina gávuheilsan frá Robert Mcbirnie.
Eisini var hetta eitt sera gott ár hjá gentuliðunum hjá VB, tí tær vunnu trý føroyameistaraheiti, í gentum 12, gentum 14 og gentum 16. Fleiri av hesum gentunum vóru við til at mynda besta VB-liðið, sum í nógv ár kappaðist í toppinum í føroyskum kvinnuholdbólti.
Hetta saman við at vinna steypakappingina í 1993, greipuna í 2003 og FM í 2005 eru nokk hæddarpunktini hjá hjá hondbóltinum í Vági í nýggjari tíð.

Annars hevur besta kvinnulið hjá felagnum verið í steypafinaluni 8 ferðir:

1991 Skála-VB 12-11

1993 VB-Stjørnan 21-13

2000 Kyndil-VB 22-21

2003 VB-VÍF 19-18

2004 Stjørnan-VB 20-19

2007 Stjørnan-VB 31-28

2012 Stjørnan-VB 27-23

2013 Neistin-VB 27-24